قومی سلامتی کمیٹی کے اجلاس کا اعلامیہ جاری

اسلام آباد: وزیراعظم شہباز شریف کی زیر صدارت قومی سلامتی کمیٹی کے اجلاس کا اعلامیہ جاری کر دیا گیا ہے۔

اعلامیے کے مطابق پہلگام حملے پر بھارتی الزامات مسترد کرتے ہوئے فیصلہ کیا گیا ہے کہ بھارت کی کسی بھی آبی یا سرحدی مہم جوئی کا منہ توڑ جواب دیا جائے گا۔ اس کے علاوہ سندھ طاس معاہدہ معطل کرنے کی بھارتی کوشش کو یکرفہ قرار دیا گیا ہے۔

اعلامیے کے مطابق بھارت کے ساتھ تمام دوطرفہ معاہدے معطل کرنے پر غور کیا گیا ہے، جس میں شملہ معاہدہ بھی شامل ہے۔ واہگہ بارڈر فوری طور پر بند، تمام بھارتی ٹرانزٹ معطل کر دیے گئے۔ SAARC ویزہ اسکیم کے تحت جاری بھارتی ویزے منسوخ، سوائے سکھ یاتریوں کے۔

اس کے علاوہ بھارتی دفاعی، فضائی اور بحری مشیروں کو ناپسندیدہ شخصیت قرار دے کر پاکستان چھوڑنے کا حکم دیا گیا ہے۔ بھارتی ہائی کمیشن کا عملہ محدود، 30 افراد تک محدود کرنے کا فیصلہ کیا گیا ہے۔ پاکستانی فضائی حدود بھارتی ایئرلائنز کے لیے فوری بند، بھارت کے ساتھ تمام تجارتی روابط معطل کرنے کا فیصلہ کیا گیا ہے۔

این ایس سی میں مؤقف اپنایا گیا ہے کہ پاکستان کسی کو اپنی خودمختاری، سلامتی اور وقار پر سمجھوتہ کرنے نہیں دے گا۔ بھارت کا کشمیر پر قبضہ، اقوام متحدہ کی قراردادوں کی مسلسل خلاف ورزی ہے۔

قومی سلامتی کمیٹی کے اعلامیے میں کہا گیا ہے کہ پہلگام واقعے کو سیاسی مقاصد کے لیے استعمال کرنا بھارت کی گھٹیا سوچ ہے۔ کلبھوشن یادیو بھارت کی ریاستی دہشتگردی کا زندہ ثبوت ہے۔ پاکستان دہشتگردی کے خلاف عالمی جنگ میں صف اول کا ملک ہے۔